ཆོས་དང་ལམ་སྲོལ།
༉ ང་བཅས་རའི་རྒྱལ་ཁབ་འདི་ ནང་པ་སངས་རྒྱས་པའི་ཆོས་དར་བའི་རྒྱལ་ཁབ་ཅིག་ཨིནམ་མ་ཚད་ རང་ལུགས་སྔར་སྲོལ་བཟང་པོ་ ཆོས་དང་མཐུན་པའི་ སྲོལ་བཟང་པོ་བཙུགས་ཡོད་མི་ཚུ་ མི་ཉམས་གོང་འཕེལ་དང་ཉམས་པ་སོར་ཆུད་འབད་ཐབས་ལུ་ རྫོང་ཁག་ནང་ཆོས་དང་ལམ་སྲོལ་སྡེ་ཚན་ཅིག་ གཞི་བཙུགས་འབད་ཡོདཔ་ཨིན།
རྫོང་ཁག་ནང་འཁོད་ལུ་ རང་ལུགས་སྔར་སྲོལ་བཟང་པོའི་ལམ་ལུགས་ཚུ་ ཉམས་མ་བཅུག་པར་རྒྱུན་སྐྱོང་འཐབ་ནིའི་དོན་ལུ་ དངོས་ཅན་གྱི་ལམ་སྲོལ་དང་ དངོས་མེད་ཀྱི་ལམ་སྲོལ་ཟེར་ གཉིས་ལུ་དབྱེ་སྟེ་ཡོདཔ་ཨིན། དངོས་ཅན་གྱི་ལམ་སྲོལ་ རྫོང་གཞི་ ལྷ་ཁང་ དགོན་སྡེ་ གནས་ མཆོད་རྟེན་མ་འདྲཝ་ཚུ་དང་ མ་ཎི་དུང་འཁོར་ ཆུ་བསྐོར་མ་ཎི་ཚུ་དང་། དངོས་མེད་ལམ་སྲོལ་ འཆམ་དང་གླུ་གཞས་ གཞུང་སྒྲ་དང་བོད་སྒྲ་ གཡུས་ཁའི་ཞབས་ཁྲ་ཚུ་དང་ གཞན་ཡང་གཙང་མོ་ སྲུང་ བློ་ཟེ་ལ་སོགས་པ་ཚུ་ ཚུདཔ་ཨིན། སྤྱིར་བཏང་མི་སྡེ་ནང་ལུ་ སྒྲིག་ལམ་རྣམ་གཞག་གི་ ཁྱད༌ཆོས༌མཐུན་མོང་མ་ཡིན་པའི་ སྲོལ་བཟང་པོ་ཚུ་ མི་ཉམས་པར་སྒྲིང་སྒྲིང་སྦེ་ གཞི་བཙུགས་འབད་དེ་ཡོདཔ་ཨིན།
དེ་མ་ཚད་ རྫོང་ཁག་ནང་འཁོད་ ལྷ་ཁང་མགོན་ཁང་ཚུ་ནང་ ནང་རྟེན་རྩ་ཆེ་ཏོག་ཏོ་ཡོད་མི་ཚུ་ བྱུང་བ་བཞིའི་དང་ ཨར་རྐུན་ལ་སོགས་པའི་རྐྱེན་ངན་ཚུ་ལས་སྲུང་ཐབས་དང་ གསར་བཞེངས་དང་ཉམས་བཅོས་ཀྱི་ འཆར་གཞི་གོང་འཕེལ་གྱི་ལས་རིམ་བརྩམས་ནི། དེ་ལས་ དུས་མཆོད་འབུམ་སྡེ་དང་ ཚེས་བཅུའི་འཆམ་དང་གླུ་གཞས་ སྔར་སྲོལ་བཟང་པོའི་ལམ་དང་ལུགས་སྲོལ་ཚུ་ ཉམས་མ་བཅུག་པར་རྒྱུན་སྐྱོང་འབད་དོཝ་ཡོདཔ་ཨིན། གཞན་ཡང་ རྫོང་ཁག་ཆོས་མཐུན་ཚོགས་པ་དང་ སྨོན་ལམ་ཆེན་མོ་ བཛྲ་གུ་རུ་དུང་སྒྲུབ་ དུས་དང་དུས་སུ་ སྐུ་རིམ་བསྒྲུབ་ནི་ཚུ་ འགོ་འདྲེན་འཐབ་དགོཔ་ཨིན། དེ་དང་གཅིག་ཁར་ རྫོང་ཁ་གོང་འཕེལ་ལྷན་ཚོགས་ཀྱི་ ངོ་ཚབ་འགོ་དཔོན་སྦེ་ རྒྱལ་ཡོངས་སྐད་ཡིག་རྫོང་ཁ་ ཡར་རྒྱས་དང་གོང་འཕེལ་གཏང་ཐབས་ཀྱི་ ལས་རིམ་དང་ལས་སྣ་ཚུ་ཡང་འགོ་འདྲེན་འཐབ་དགོཔ་ཨིན།
